Në Komunën e Ferizajit që udhëhiqet nga PDK është botuar libri “Degradimi i Pavarësisë së Kosovës” i autorit Muhamet Shabani. Në këtë libër, nxjerrën konstatime që direkt e sulmojnë themeluesin e kësaj parti dhe ish-Presidentit Hashim Thaçi.

Pas kësaj Komuna ka dal me sqarim duke thënë se përmes operatorit ekonomik mbështet botimin e veprave të autorëve të ndryshëm.

“Drejtoria e Kulturës, Rinisë dhe Sportit, sqaron opinionin publik, se ka disa vite, që mbështet jo financiarisht, por përmes botimit vepra të autorëve të ndryshëm ferizajas, përmes operatorit ekonomik të përzgjedhur për këtë veprimtari. Edhe kjo vepër, është botuar përmes këtij operatori ekonomik, sipas kërkesës për mbështetje të parashtruar nga autori Muhamet Shabani“, sqaroi Komuna.

Por, se sipas tyre në rastin në fjalë është keqpërdorur besimi.

“Pra, referuar një tradite shumëvjeçare të mbështetjes së autorëve ferizajas, përmes botimit falas të veprave të tyre nga Drejtoria e Kulturës, Rinisë dhe Sportit, rasti konkret paraqet një shkelje e keqpërdorim të rëndë të besimit e mirëkuptimit, qasje joprofesionale e gjuhë të papranueshme të përdorur nga autori“, thuhet në reagim.

Dje për këtë ka reaguar edhe një anëtarë i kësaj partie, dikur zëvendësministër i arsimit, Nehat Mustafa.

Reagimi nis me “Skandaloze – Komuna e Ferizajt sponsorizon për botim librin që akuzon deri në tradhti ish krerët e UÇK dhe PDK që janë në Hagë“, tha Mustafa.

Ish-zëvendësministri deklaron se libri është sponsorizuar nga Drejtoria e Kulturës në Ferizaj në vitin 2021, dhe përveç Thaçit sulmohet edhe ish-kryetari i Kuvendit, Kadri Veseli.