Partia Socialdemokrate ka mbajtur një aktivitet simbolik para Kuvendit, me slloganin “Kuvend Jodemokratik”, shkruan Insajderi.
Gjatë këtij aksioni, Nol Nushi, ka kritikuar qasjen e Kuvendi për mosdiskutim në seancë të Projektligjit për faljen e gjobave të shqiptuara gjatë pandemisë.
“E vonuan, e zvarritën, por nuk arritën ta ndalin. Peticioni i nënshkruar nga mbi 11 mijë qytetarë, ku kërkohet inicimi i ligjit për faljen e gjobave të pandemisë, tash së fundi kaloi të gjitha procedurat burokratike, por jo edhe lejimin e pjesëmarrjes në seancë ku diskutohet dhe votohet kjo temë”.
“Është dekurajuese qasja e Kuvendit, përkatësisht kryeparlamentarit Konjufca, për qytetarët që kanë nevoja dhe organizohen rreth çështjeve në interes për ta. Demokracia përfaqësuese është më e gjerë sesa formaliteti i shtruar në institucione”.
Sipas Nushit, përfaqësuesit e Kuvendit janë të kapur ngushtë pas pushtetit të tyre.
“Ligji e mundëson, deputeti e refuzon. Në vend se të nxiten iniciativat e tilla dhe të mbrohen direkt nga qytetarët, frika e pushtetit zuri ulësen e tyre. Këta përfaqësues janë të kapur ngushtë pas pushtetit të tyre”.