Naby Keita do të largohet në fundin e sezonit nga Liverpooli. Mesfushorit i përfundon kontrata në verën e këtij viti dhe do të jetë opsion i lirë për shumë klube. Së fundmi, shtypi britanik ka raportuar se Milani ka shfaqur interesim për ta transferuar 28 vjeçarin në merkaton e verës.

Keita është i lirë të nënshkruajë një parakontratë, sepse i lejohet të bëjë këtë zgjidhje në momentin që ndodhet në gjashtë muajt e fundit të kontratës. Lojtari nga Guinea numëron 127 paraqitje në total me Liverpoolin, në katër vitet e gjysmë në “Anfield”.

Mesfushori ka shënuar 11 gola me “The Reds”, teksa në fundin e dhjetorit la pas dëmtimin dhe u rikthye në fushën e lojës. Këtë sezon, Keita numëron 6 paraqitje në Premier League.

Me Liverpoolin ka fituar gjashtë trofe: Premier League, Champions League , Fa Cup, Carabao Cup, Botërorin për Klube dhe Superkupën e Anglisë. Milani transferoi Divock Origin nga Liverpool me parametra zero.

Në të njëjtën mënyrë kuqezinjtë synojnë edhe firmën me Naby Keita. Ky i fundit u transferua nga Leipzigu te Liverpooli për 60 milionë euro në verën e vitit 2018.