Kryeministri britanik, Rishi Sunak, u takua me Presidentin e Ukrainës, Volodymyr Zelensky, në vizitën e tij të parë në Kiev, që nga marrja e detyrës.

Takimi u mbajt për të “konfirmuar mbështetjen e vazhdueshme të Mbretërisë së Bashkuar” për Ukrainën, tha një zëdhënës.

“Ne diskutuam çështjet më të rëndësishme si për vendet tona ashtu edhe për sigurinë globale,” shkroi Zelensky në Telegram pas takimit.

“Ne jemi më të fortë dhe do të arrijmë rezultatet e dëshiruara”, shtoi ai, shkruan BBC

Sunak tha se Mbretëria e Bashkuar do të vazhdojë të qëndrojë pranë ukrainasve në luftën e tyre.

Gjatë takimit me Zelenskyn, ai tha se Mbretëria e Bashkuar do të sigurojë një paketë të re të madhe të mbrojtjes ajrore për të ndihmuar në mbrojtjen e civilëve ukrainas dhe infrastrukturës kombëtare të vendit nga sulmet ruse.

Ukraina ka kërkuar ndihmë nga vendet perëndimore gjatë muajve të fundit pas sulmeve intensive ajrore ruse në Kiev dhe në të gjithë vendin.

Paketa prej 50 milionë £ e ndihmës mbrojtëse përfshin 125 armë kundërajrore dhe teknologji për të luftuar dronët vdekjeprurës të furnizuar nga Irani.