Mediat të afërta me Qeverinë në Serbi, gjatë ditës së premte kanë raportuar se Njësia Speciale e Kosovës ka bastisur fabrikën e veglave “Lola” në Zubin Potok. Madje u hiperbolizua duke thënë se të pranishëm janë parë 50 pjesëtarë të policisë. Por krejt këto raportime i ka demantuar zëvendësdrejtori i Policisë së Kosovës për Veriun e Mitrovicës, Veton Elshani.

Elshani ka dhënë detaje për Insajderi se çfarë realisht ndodhi në atë anë sot.

Konfirmoi se vetëm i kanë asistuar Agjencisë Kosovare të Privatizimit meqë këta të fundit kishin parashtruar një kërkesë të tillë.

Ai mohoi se ka pasur ekipe të njësisë speciale që asistuan, siç pretenduan mediat serbe.

“Agjencia Kosova e Privatizimit ka pasur kontrollin e tyre, evidentimin e mallit, vet AKP ka kërkuar asistencën tonë për ta kryer punën e tyre dhe nuk ka pasur njësi të Speciales, por vetëm disa patrulla të Mitrovicës së Veriut”, tha ai për Insajderin.