Aktorja doajene dhe regjisorja, Melihate Qena, do të realizojë një shfaqje artistike teatrore në qytetin e Gjilanit.

Teatri i Gjilanit e ka përzgjedhur artsiten dhe regjisoren për ta inskenuar shfaqjen “Petrushi i huaj”.

Provat e para vetëm sa kanë filluar, ndërsa premiera e saj do të jetë gjatë muajit qershor.

Melihate Qena lindi në vitin 1949 në qytetin e Mitrovicës. Ka studiuar për aktrim në Universitetin e Beogradit. Deri në vitin 1990 ka punuar në TVP (Televizioni i Prishtinës) dhe krahas kësaj ka realizuar një sërë rolesh në teatër dhe film.

Po ashtu, ka punuar edhe në teatrin  “Dodona” të Prishtinës, ku shquhet për regjinë e një sërë shfaqjeve për fëmijë në kuadër të këtij teatri. Në vitin 2015 ajo u nderua me shpërblimin për veprimtari jetësore e kulturore nga Ministria e Kulturës, Rinisë dhe Sportit.