Ish-ylli i Arsenalit, Mesut Ozil, ka bërë një premtim për tifozët e Tottenham Hotspur nëse skuadra e tyre shmang humbjen nga Manchester City.

Spurs kanë përjetuar një sezon të parë të përzier nën drejtimin e Ange Postecoglou, por ata ende mund të luajnë një rol të madh në vendosjen e garës për titull në Ligën Premier.

Tottenham do të përballet me kampionët në fuqi, Man City, të martën mbrëma, me vizitorët që duhet të fitojnë në Londrën Veriore për të qëndruar në vendin e parë deri në xhiron e fundit.

Nëse City humbet pikë, atëherë Arsenali ka të ngjarë të fitojë titullin e parë që nga viti 2004 nëse mposht Everton të dielën.

Duke pasur parasysh urrejtjen e tyre ndaj Arsenalit, shumë mbështetës të Spurs po ndihen të konfliktuar.

Është e vështirë për çdo tifoz futbolli të dëshirojë humbje nga skuadra e tij, por tifozët e Tottenham e dinë se një fitore ose barazim të martën do të rrisë në mënyrë drastike shanset që rivalët e tyre të Londrës Veriore të kurorëzohen kampionë të Ligës Premier.

Është një situatë e çuditshme edhe për tifozët e Arsenalit, pasi ata nuk janë mësuar të brohorasin për fqinjët e tyre.

Megjithatë, kjo është pikërisht ajo që do të bëjë ish-yll i Topçinjve, Mesut Ozil, të martën në mbrëmje.

Ish-mesfushori, i cili kaloi tetë vjet në Emirates Stadium midis 2013 dhe 2021, madje ka dhënë një premtim për tifozët e Spurs nëse skuadra e tyre i bën një nder Arsenalit.

Të martën, Ozil postoi në X: “Për herë të parë sonte: HAJDE JU SPURSSS!! Nëse Tottenham nuk e humb këtë lojë, unë nuk do të tallem më kurrë me ta… Unë premtoj.”

Një fitore për Spurs do ta linte Arsenalin një pikë përpara Cityt, me garën për titull që shkon në xhiron e fundit, por edhe një barazim do ta linte skuadrën e Mikel Artetës në kontroll falë diferencës së tyre superiore të golave.

Në atë rast, dhe nëse të dy pretendentët për titull fitojnë në xhiron e fundit, atëherë City do të kishte nevojë për një fitore me katër gola për të siguruar një kurorë të katërt radhazi në Ligën Premier. /Telegrafi/