“A e njihni Florin Krasniqin”, kështu e ka pyetur sot deputeti i Lëvizjes Vetëvendosje, Armend Muja ish-ministrin e Energjisë, Et’hem Çeku në mbledhjen e Komisionit Hetimor Parlamentar për Energji.

Muja i cili së fundmi i është bashkuar partisë së Kurtit ka lë të nënkuptohet se një takim i mundshëm mes Çekut e ish-deputetit të VV-së, Florin Krasniqi mund të ishte korruptiv.

Muja që njeherit është anëtar i këtij komisioni ka kërkuar nga Çeku të di nëse e ka takuar ish-deputetin Florin Muja, afaristin shqiptar në SHBA sa e ka ushtruar postin e ministrit.

“Një Florim Krasniqi e njoh nga fakultetit… dhe, Florin Krasniqin e Vetëvendosjes, po njoh edhe atë. Jo gjatë asaj kohe sa kam qenë ministër nuk e kam njohur”, deklaroi ish-ministri.

Po me kaq nuk është ndalur Muja, ai sërish e pyeti “A e keni takuar personalisht atë gjatë asaj kohe?”, insistoi Muja.

“Mund të jetë që e kam parë, mund të jetë që e kam takuar, por mua nuk më kujtohet sot a e kam takuar para 16 vitesh Florin Krasniqin. Në luftë e di se ka qenë edhe ka bërë punë të mirë”, tha ish-ministri i Energjisë.

“Nuk e di a jam takuar, nuk e di”, potencoi ai.

Komisioni që heton çështjen e lidhura me energjinë gjatë periudhës 2006-2022, ka intervistuar sot tre ish-ministra të Qeverisë së Kosovës.

Përveç Ethem Çekut, janë intervistuar edhe ish-ministrat Haki Shatri dhe Bujar Dugolli.

Shatri është përgjigjur për mandatin e tij si ministër gjatë periudhës 2005-2007.