Po bëhen afro katër muaj që kur ndërmarrja e Përparim Ramës ka mbetur pa energji elektrike. Punëtorët e ndërmarrjes Rekreative Gërmia janë detyruar edhe gjatë muajve të ftoftë të dimrit të punojnë në temperature minus. Insajderi ju sjell detajet.
Pa energji elektrike, punëtorët e Qendrës Rekreative – Gërmia kanë mbetur për shkak të një borxhi që komuna e Prishtinës nuk po e paguan. Në faturën e siguruar nga Insajderi shihet se Qendra Rekreative – Gërmia ka një borxh ndaj KESCO-s prej 1 mijë e 754 euro në total.
Ky borxh, ligjërisht duhet të mbulohet nga Komuna e Prishtinës.
Punëtorë të kësaj ndërmarrje jo-zyrtarisht i kanë thënë Insajderit, se komuna është në dijeni të këtij borxhi, por që nuk po e kuptojnë arsyen pse nuk po kryhet.
Gazeta Insajderi ka ditë që ka kërkuar përgjigje nga Komuna e Prishtinës se përse nuk po i kryejnë obligimet e tyre ndaj kësaj ndërmarrje, por të njëjtit nuk kanë kthyer përgjigje deri tani.
Qendra Rekreative Rinore Germia gjendet rreth 2km larg qendrës së kryeqytetit. Qendra ekziston që nga vitet e 80-ta, por është djegur gjatë luftës, renovimi i saj kishte përfunduar në vitin 2008.
/Insajderi