Më lart se ai nuk ka shkuar askush, për sa i përket elitës së Serisë A.

Kristjan Asllani do të jetë brenda kësaj jave një futbollist i Interit, me organizatorin e Kombëtares shqiptare, i cili do të kërkojë të bindë të gjithë se e meriton këtë transferim.

Pas akordit dhe takimit deciziv të së premtes, 20- vjeçari do të nënshkruajë një kontratë 5-vjeçare.

“Pirlo” i skuadrës së Empolit do të bëjë hapin e parë të madh të karrierës, pasi milanezët kanë paguar për të 4 milionë euro për huazimin njëvjeçar, ndërkohë që marrëveshja përfshin blerjen e detyrueshme për 10 milionë euro të tjera, 2 milionë bonuse për vazhdimësinë e aventurës tek Interi, plus huazimin e sulmuesit zikaltër, Martin Satriano në radhët e Empolit.

Në të njëjtën kohë e përditshmja prestigjioze “Gazzetta dello Sport” jep edhe indiciet e para lidhur me rrogën që do të përfitojë Kristjan Asllani.

Paga për sezonin e parë të shqiptarit nën ngjyrat zikaltër do të jetë 800 mijë euro, por ajo do të ketë një rritje progresive të vazhdueshme sezon pas sezoni, e cila mendohet të jetë mes 100 ose 200 mijë eurove vjetore.

Sido që të jetë, për 20- vjeçarin është një hap jo i vogël, duke menduar se tek Empoli ai ishte ende nën regjimin e kontratës së detyruar për lojtarët e rinj, e cila përfshin një rrogë bazë dhe fikse prej 120 mijë eurosh vjetore (tek Interi i është 7- fishuar).

Vizitat mjekësore për Asllanin janë paracaktuar këtë javë, pas së cilave lojtari do të firmosë kontratën e tij, në pritje për t’iu bashkuar urdhrave të trajneri Simone Inzagi më datë 6 korrik, në “Appiano Gentile”.

Kujtojmë që Interi për të arritur te Kristjani ka mundur edhe konkurrencën e Milanit, por jo vetëm, për ta bërë sa më shpejt të vetin (edhe përpara blerjeve të Romelu Lukakut dhe Paulo Dibalës) atë që pritet të jetë organizatori përpara mbrojtjes i së ardhmes interiste.

Për Asllanin do të jetë një sfidë shumë e madhe kjo që e pret, pasi jo vetëm kalimi nga provinca në elitë emocionalisht ndikon, por në Milano të gjithë janë të bindur se shqiptari mund të bëjë atë rolin “alla Pirlo”, i cili do të shtonte rrugët e qarkullimit të topit, por edhe rrezikshmërinë në lojën e Interit.