Lojtari 17-vjeçar i Prishtinës, Igball Jashari, njëherësh nipi i heroit legjendar, Adem Jashari, para disa ditësh debutoi me Prishtinë në Kupën e Kosovës, ku edhe shënoi gol nga pika e bardhë, në fitoren 6-0 ndaj Vushtrrisë, duke kaluar në finale.

Jashari tha se është një ndjenjë shumë e mirë që në moshën 17-vjeçare të shënojë gol për Prishtinën.

“Falënderoj trajnerin Debatik Curri që ma besoi goditjen nga penalltia”, tha Igballi në Sports Show të Klan Kosova.

Jashari shtoi se prej shkuarjes në klubin e Prishtinës, lojtarët e tjerë e kanë pritur mjaft mirë.

“Jam mjaft i lumtur për kontributin që e kam dhënë, jemi në finale me një ekip të mirë siç është Gjilani. Por mendoj se do të kemi një rezultat pozitiv”.

Pasardhësi i familjes Jashari po ashtu tha se synon që në vitin tjetër, kur të bëhet 18-vjeç, bashkë me Prishtinën të bëhet kampion.

“Kam ëndërr që vitin tjetër, në 18-vjeç, të bëhem kampion i Kosovës”.

Ai po ashtu tha se skuadra e zemrës së tij është Real Madridi dhe se ëndrra e tij është që një ditë të luajë për ta, ndërsa lojtari favorit i tij është Kylian Mbappe.

Nipi i Adem Jasharit foli edhe për punën si kapiten në kombëtaren e Kosovës, për çka tha se është një ndjenjë e papërshkrueshme të luash për vendin tënd.