![](https://insajderi.org/wp-content/themes/insajderi-org/logo/menu-insajderi.png)
Jetnis Berisha është njëri nga të plagosurit mbrëmë në Pejë. Ai bashkë me babain e tij dhe vëllaun u plagosën nga 21 vjeçari Agron Gashi, pas një mosmarrëveshje mes tyre.
Jetnisi është edhe pjestar i Forcës së Sigurisë së Kosovës. Kjo vërtetohet edhe në postimet e tij në rrjetet sociale. I uniformuar dhe në duar me kallashnikov të FSK-së, janë disa nga fotografitë e publikuara nga Jetnis Berisha.
Derisa, tashmë është arrestuar edhe i riu Agron Gashi, që dyshohet se është personi që i plagosi tre persona mbrëmë në qendër të Pejës.
Arrestimi i tij është konfirmuar edhe nga ana e Policisë së Kosovës.
Derisa, njëri nga tre të plagosurit janë në gjendje të rëndë shëndetësore.
Specialisti i Anesteziologjisë me Mjekim Intensiv, Abdullah Hajdari, tha se gjendja e njërit nga të plagosurit në Pejë është shumë e rëndë.
Hajdari tha se pacienti që është në mjekim intensiv ka lëndime në regjionin ë këmbë së majtë dhe regjionin e barkut të cilat ia rrezikojnë jetën.
Hajdari po ashtu shtoi se pacienti është në gjendje të shokut hemorragjik, pavarësisht që tek i njëjti është intervenuar për rreth 6 orë në trajtimin e plagëve të marra nga arma e zjarrit.
“Njëri nga të plagosurit është i hospitalizuar nga orët e mëngjesit në Klinikën e Mjekimit Intensiv. Ai po qëndron i intubuar, dmth është në ventilim mekanik, është në gjendje shumë të rëndë sepse ka lëndime nga arma e zjarrit në regjionin e këmbës së majtë dhe regjionin e barkut të cilat po ia rrezikojnë jetën. Rreth 6 orë është punuar mbrëmë deri në orët e mëngjesit, 4 ekipe të kirurgëve, anesteziologë, kirurgu vaskular, ortopedi, urologu, por të shohim tutje, ende mbetet kritike, është në gjendje të shokut hemorragjik”, tha Hajdari.