Kosova ka pësuar rënie për dy pozita në ranglistën e FIFA-s. Ranglista e re e FIFA-s u publikua të enjten, ndërsa Kosova ka rënë nga pozita e 109-të në pozitën e 111-të me 1181 pikë.

Përfaqësuesja e Kosovës në dy ndeshjet kualifikuese për “Euro 2024” të këtij muaji pësoi disfatë nga Rumania 2:0, ndërsa barazoi me Zvicrën në Prishtinë me rezultatin 2:2. Kosova ka humbur gjasat për kualifikim në Evropianin e vitit të ardhshëm që do të mbahet në Gjermani.

Ndërkohë, Shqipëria ka shënuar ngritje për tri pozita. Nga vendi i 65-të, Shqipëria është ngritur në vendin e 62-të me 1395 pikë. Shqipëria barazoi me Çekinë 1:1, kurse fitoi ndaj Polonisë me rezultatin, 2:0.

Argjentina është në vendin e parë, Franca të dytin, kurse Brazili në vendin e tretë. Zvicra ka rënë në pozitën e 14-të.