Basketbollistët e Kosovës në fundjavë janë stërvitur për dy ndeshjet parakualifikuese për FIBA Eurobasket 2025, ndërsa sot (e hënë) kanë udhëtuar drejt Norvegjisë.

Dardanët do të përballen me Norvegjinë në udhëtim më 25 Nëntor, kurse më 28 Nëntor e presin në shtëpi Danimarkën.

Përzgjedhësi i Kosovës, Christos Marmarinos, ka folur për rëndësinë e këtyre dy ndeshjeve.

“Mendoj se nuk ka nder më të madh se të përfaqësosh vendin tënd në garat ndërkombëtare. Basketbollistët e Kosovës e dinë rëndësinë e ndeshjeve dhe sigurisht se presim që do të japin maksimumin në parket. Nuk do të mungoj angazhimi ynë dhe do të japim më të mirën tonë për rezultate pozitive”, është shprehur Marmarinos për faqen zyrtare të FBK-së, përcjell Zeri.info.

Marmarinosi ka komentuar edhe dy përballjet e Kosovës, ndaj Norvegjisë dhe Danimarkës.

“Do t’i qasemi ndeshjeve një nga një. Ne besojmë në rezultate pozitive. Është rëndësishme atmosfera në ekip dhe të bëjmë më të mirën tonë për të fituar. Janë dy ndeshje me rëndësi në një rrugëtim të gjatë”, ka thënë tutje përzgjedhësi i Kosovës.

Kosova do të përballet me Norvegjinë më 25 nëntor, me fillim në orën 19:00, në Bergen, kurse ndaj danezëve do të luajë në shtëpi më 28 nëntor, në orën 19:00.