Të dielën do të mbahet ndeshja Kosovë vs Izrael. Kjo ndeshje do të zhvillohet në stadiumin “Fadil Vokrri” në Prishtinë.

Kjo ndeshje e cila po luhet në kuadër të kualifikimeve për Kampionatin Evropian të vitit 2024 – fillimisht ishte planifikuar të zhvillohej më 15 tetor. Por, ajo ishte shtyrë shkaku i luftës në Lindjen e Mesme.

Pikërisht për shkak të luftës që po zhvillohet mes Izraelit dhe palestinezëve, Policia e Kosovës ka shtuar masat e sigurisë.

Në një përgjigje për Gazetën Insajderi thuhet se policia ka marrë të gjitha masat e nevojshme operative në aspektin e sigurisë.

Këto masa të përgjithshme do të ndërmeseen para, gjatë dhe pas zhvillimit të ndeshjes.

“Policia e Kosovës sikurse edhe në ndeshjet tjera kualifikuese sportive që ka ndërmarr masat e nevojshme operative në aspektin e sigurisë, edhe në këtë rast për ndeshjen sportive “Kosova vs Izraeli” përmes urdhrit operativ ka paraparë ndërmarrjen e masave të sigurisë së përgjithshme para, gjatë dhe pas zhvillimit të ndeshjes sportive”, thuhet në përgjigjen e Policisë për Insajderin.

Nga policia bëjën të ditur se janë duke bashkëpunuar edhe me  FFK për mbajtjen e rendint dhe sigurisë publike.

“Policia e Kosovës, ka bashkëpunim të mirë me të gjitha institucionet relevante, përfshirë Federaten e Futbollit të Kosovës, me të cilët shkëmben, bashkërendon dhe koordinon aktivitetet dhe veprimet të cilat bien në fushën e sigurisë. Andaj konform planifikimeve operacionale, Policia e Kosovës do të kujdeset për mbajtjen e rendit, qetësisë dhe sigurisë publike si dhe ndërmarrjen e masave të nevojshme policore, me qëllim që ky eveniment sportiv të kaloj qetë sikurse edhe eventet tjera sportive të kësaj natyre”, thuhet në përgjigje.

Ndërsa nga Federata e Fudbollit të Kosovës ende nuk kanë kthyer përgjigje për masat që do ndërmerren gjatë zhvillimit të ndeshjes.

Nga FFK, kanë njoftuar se në ndeshje do të lejohen prezenca e tifozëve.

/Gazeta Insajderi/