Dy parti, Aleanca për Ardhmërinë e Kosovës (AAK) dhe NISMA kanë zyrtarizuar kohë më parë koalicion parazgjedhor. Një ftesë për t’u bashkuar në këtë koalicion i ka shkuar edhe Partisë Social Demokrate (PSD), por që kryesuesja e Këshillit Drejtues, Donjeta Demolli po thotë se e kanë refuzuar.
Demolli ka deklaruar se në zgjedhjet e ardhshme PSD-ja do të garojë e vetme.
“Ne e kemi marr ftesën prej AAK-së dhe përgjigja jonë ka qenë negative, për arsye se ne besojmë që si parti e kemi të nevojshme që të komunikojmë direkt me qytetarin dhe të shkojmë të vetëm në zgjedhje, duke përfaqësuar bindjet tona dhe rrugëtimin tonë pa një koalicion në zgjedhje të ardhshme. Ne kemi vendosur që nëse nuk ndryshon diçka në të ardhmen, do të shkojmë vetëm në zgjedhje” është shprehur ajo në emisionin “Këndi i Debatit në Tëvë 1.
Tutje, duke e mbështetur qëndrimin e saj në një hulumtim, ajo ka thënë se 33 për qind e qytetarëve të Kosovës e vlerësojnë pozitivisht angazhimin e kësaj partie, ndërsa 12 për qind mendojnë se opozitarizmi i PSD-së i mungon aktualisht Kuvendit.