Kryeministri kanadez Justin Trudeau i ka kërkuar Indisë të hetojë seriozisht pretendimin e tij se ai ka informacione të besueshme që lidhin Nju Delhin me vrasjen e një aktivisti separatist sikh në tokën kanadeze, duke agravuar një akuzë që ka shkaktuar një konflikt diplomatik dhe po kërcënon një përkeqësim të situatës në marrëdhëniet mes dy vendeve.

Trudeau tha të martën se Kanadaja nuk po përpiqej të “provokonte” Indinë ose të “përshkallëzonte” situatën, por “thjesht po parashtronte faktet”.

Ai tha se qeveria e tij “do të ndjekë provat dhe do të sigurohet që puna të bëhet për t’i mbajtur njerëzit përgjegjës”. Pretendimi i Kanadasë se qeveria indiane ishte e përfshirë potencialisht në vrasjen e qershorit të liderit të shquar Sikh, Hardeep Singh Nijjar, ka zemëruar Nju Delhi, i cili e ka mohuar me forcë pretendimin, duke e quajtur atë “absurd dhe të motivuar”.

Ekspertët thonë se mosmarrëveshja ngre mundësinë e një përçarjeje të paprecedentë midis dy partnerëve kryesorë të Shteteve të Bashkuara dhe potencialisht i vendos vendet e tjera të mëdha perëndimore në një pozitë të pakëndshme.

Hardeep Singh Nijjar ishte një mbështetës i hapur i krijimit të një atdheu të veçantë Sikh të njohur si Khalistan, i cili do të përfshinte pjesë të shtetit Punjab të Indisë.

Vdekja e Nijjar në qershor tronditi komunitetin Sikh në Kanada, një nga më të mëdhenjtë jashtë Indisë me më shumë se 770,000 anëtarë. Lëvizja Khalistan është e paligjshme në Indi dhe konsiderohet një kërcënim për sigurinë kombëtare nga qeveria. Një numër grupesh të lidhura me lëvizjen renditen si “organizata terroriste” sipas Aktit të Veprimtarive të Paligjshme të Indisë (UAPA).