I pari i Prishtinës, Përparim Rama dhe kryetari i Vitisë, Sokol Haliti kanë pozuar sot krahpërkrah me kryetarin e Londrës, Sadiq Khan gjatë Samitit të Qyteteve të Fuqishme i cili po mbahet në New York.
Rama pozoi sot i buzëqeshur me të parin e kryeqytetit të Mbretërisë së Bashkuar për një fotografi në Facebook. Kryetari i Prishtinës e cilësoi këtë takim ‘të mrekulleshëm‘.
“Takim i mrekullueshëm me Kryetarin e Londrës, Sadiq Khan, gjatë Samitit të Qyteteve të Fuqishme i cili po mbahet në New York. Biseduam mbi sfidat e qyteteve tona dhe shkëmbyem ide se si mund t’i ndryshojmë vendet tona për të mirë“, ka shkruar Rama.
Takim ‘shumë të përzemërt‘ kishte edhe kryetari i Vitisë me kryetarin e Londrës. Të paktën kështu tha Sokol Haliti.
“Gjatë samitit në New York, pata një takim shumë të përzemërt me kryetarin e Londrës, Sadiq Khan“, ka shkruar Haliti në mbishkrimin e fotografisë.
Se a ishin këto dy takime të mrekullueshme edhe për Khan ende nuk dihet.
Kryetari londinez nuk e ka cekur në asnjë rrjet social të tij që ka zhvilluar takim të përzemërt me kryetarin e Vitisë dhe as nuk ka ndonjë njoftim të tij për takim të mrekullueshëm me Ramën.