Ministria e Administratës Publike dhe Radiotelevizioni i Kosovës kanë lidhur një Marrëveshje Mirëkuptimi për ndërtimin e ndërtesës për nevojat e Radio Televizionit të Kosovës.

Ministria për ndërtimin e objektit të televizionit publik, ka ndarë një sipërfaqe prej tetë hektarësh në zonën Prishtina e Re.

“Sipas kësaj marrëveshjeje, Ministria e Administratës Publike obligohet të sigurojë lokacionin në të cilin do të ndërtohet ndërtesa bazuar në vendimin e komunës së Prishtinës të datës 04.05.2015, bazuar në kontratën e datës 11.02.2016 të lidhur ndërmjet MAP-it dhe komunës së Prishtinës, të hartojë planin urbanistik, të afrojë edhe dokumentacionin tjetër përkatës dhe ta ndihmojë RTK-në gjatë realizimit të projektit. Ndërsa, RTK-ja obligohet ta financojë hartimin e projektit dhe të ndërtesës në harmoni me planin urbanistik”, thuhet në njoftimin e Ministrisë.

“Marrëveshja, nga palët nënshkruese u vlerësua e rëndësishme dhe historike për RTK-në, e cila do t’i krijojë këtij institucioni, mundësinë e ndërtimit të ndërtesës moderne për RTK-në, me ç’rast do të krijohen edhe kushte shumë të mira për punë dhe veprimtari televizive”, thuhet në njoftim.