Dokumentet e klasifikuara të SHBA-së, disa prej të cilave u klasifikuan si “tepër sekret”, zbuluan në internet detaje të pikëpamjeve të Uashingtonit për luftën në Ukrainë dhe duket se përmbajnë informacione të ndryshme rreth aleatëve të ngushtë të Shteteve të Bashkuara.

Pentagoni e konsideron zbulimin e këtyre dokumenteve konfidenciale si një “rrezik shumë serioz” për sigurinë kombëtare të SHBA-së dhe Departamenti i Drejtësisë ka nisur një hetim penal për këtë çështje.

Vërtetësia e fotove, të cilat qarkullojnë në faqe të ndryshme interneti, ende nuk është konfirmuar publikisht nga autoritetet dhe as nuk është verifikuar nga burime të tjera.

Këtu është një përmbledhje e përmbajtjes së disa prej këtyre dokumenteve:

Lufta në Ukrainë

Një nga dokumentet paraqet pasqyrën e luftës në Ukrainë deri më 1 mars 2023, një vit pas fillimit të luftimeve. Bazuar në vlerësimet e Agjencisë së Inteligjencës së Mbrojtjes të SHBA-së, viktimat ruse ishin 189,500 – 223,000 burra – nga të cilët 35,500 – 43,000 u vranë në aksion dhe 154,000 – 180,000 u plagosën.

Nga pala ukrainase, vlerësohet se të vdekurit janë midis 15,500 – 17,500 dhe të plagosurit 109,000 – 113,500.

Këto shifra janë pothuajse dhjetë herë më të larta se çdo shifër që Rusia dhe Ukraina kanë njoftuar deri më sot.

Moska thuhet se ka humbur më shumë se 150 avionë dhe helikopterë, krahasuar me 90 të Kievit.

Një tjetër “version” i dokumentit, me sa duket i redaktuar, thotë se viktimat ukrainase janë më të mëdha se ato ruse, gjë që duket se konfirmon frikën e Pentagonit se rrjedhja potencialisht mund të nxisë dezinformimin.

Mungesa e raketave kundërajrore

Dy dokumente të datës 28 shkurt i referohen gjendjes alarmante të mbrojtjes ajrore të Ukrainës, e cila deri më tani ka luajtur një rol kritik në parandalimin e sulmeve ajrore ruse, duke penguar Moskën të vendosë hapësirën e saj ajrore nën kontrollin e saj.

Aftësia e Kievit për të mbajtur mbrojtje ajrore me rreze të mesme për të mbrojtur vijën e tij të frontit “do të zerohet deri më 23 maj”, thuhej në një nga dokumentet.

Pothuajse 90% e mbrojtjeve ajrore të Ukrainës me rreze të mesme dhe të gjatë bazohen në thelb në sistemet SA-11 dhe SA-10 të prodhimit sovjetik, të cilëve mund t’u mbarojnë municionet përkatësisht në fund të marsit dhe në fillim të majit.

Sulmet me dron në Rusi në shqyrtim

Sipas një dokumenti pa datë, presidenti ukrainas Volodymyr Zelensky i shprehu zhgënjimin e tij gjeneralit të tij tanimë të rangut më të lartë, sepse ushtrisë ukrainase i mungojnë raketat me rreze të gjatë që mund të godasin forcat armike drejtpërdrejt në tokën ruse. Ai raportohet se ka sugjeruar, në fund të shkurtit, që të kryhen sulme të tilla me dron.

Ky informacion duket se sugjeron se Uashingtoni po monitoronte një partner të ngushtë. Ata gjithashtu mund të shpjegojnë pjesërisht hezitimin e SHBA në lidhje me kërkesën e Kievit për të dërguar armë me rreze më të gjatë. Megjithatë, ngurrimi amerikan i paraprin bisedës së Zelenskit me gjeneralin e tij.

Demonstrata në Izrael

Një dokument tjetër, gjithashtu pa datë, thotë se udhëheqja e Mossad, agjencia e inteligjencës izraelite, inkurajoi anëtarët e agjencisë dhe qytetarët e zakonshëm të protestojnë kundër reformës së diskutueshme të sistemit gjyqësor në Izrael.

Burimi i këtij informacioni, përgjimi i komunikimeve elektronike, duket se tregojnë se agjencitë amerikane po spiunonin një vend aleat.

Shqetësim për municionet e Koresë së Jugut

Këshilli i Sigurisë Kombëtare i Koresë së Jugut ishte i shqetësuar se SHBA do t’i transferonte Kievit disa municione që kishte kërkuar nga Seuli. Nëse kjo do të ndodhte do të binte ndesh me vullnetin e shprehur të Koresë së Jugut për të mos dorëzuar armë vdekjeprurëse në Ukrainë, sipas një dokumenti që citon një bisedë të 1 marsit midis dy zyrtarëve të Koresë së Jugut.

Ky zbulim duket gjithashtu se sugjeron se Uashingtoni po spiunonte një aleat të ngushtë. Opozita e Koresë së Jugut bëri thirrje sot për një hetim, por zyra e presidentit Yun Suk-yeol u përgjigj se akuzat për përgjime ishin “gënjeshtra absurde”.

Fluturime zbulimi në Detin e Zi

Një dokument i datës 27 shkurt i referohet fluturimeve zbuluese në Detin e Zi me avionë (me pilot dhe pa pilot) të SHBA-së, Britanisë, Francës dhe vendeve të tjera anëtare të NATO-s nga fundi i shtatorit deri në fund të shkurtit.

Rreth dy javë pas kësaj, Uashingtoni akuzoi ushtrinë ruse për përgjimin e një droni amerikan MQ-9 Reaper në Detin e Zi, të cilin Moska e mohoi.