Shërbimi online “The Speedtest Global Index” ka bërë matjen e shpejtësisë së internetit në 181 vende të botës, ku Kosova ka shënuar ngritjen më të lartë në këtë ranglistë për sa i përket shpejtësisë së internetit në telefona mobilë për muajin shtator.

E para në listën e “Mobile Global Performance” renditet Norvegjia me 126.94 megabajt për sekondë.

Pas Norvegjisë janë Emiratet e Bashkuara Arabe, Katari, Kina e kështu me radhë.

Edhe pse Kosova renditet e 72-ta në këtë listë, e veçanta është se sipas analizave të këtij shërbimi, shteti më i ri në Evropë ka shënuar një ngritje prej +42 vendeve në ranglistë nga muaji i kaluar.

Ndërkaq, ngritje Kosova ka shënuar edhe për sa i përket internetit “broadband” në + 6 vende në krahasim me muajin e kaluar, apo e 76-ta nga 181 vende ku është testuar shpejtësia e internetit.

Më mirë se Kosova në ranglistë për sa i përket shpejtësisë së internetit në telefon gjendet Shqipëria, e cila renditet e 51-ta, duke shënuar ngritje për pesë vende nga muaji i kaluar. Mirëpo, për internetin “broadband”, Shqipëria gjendet në pozitën 96 për këtë muaj, 20 pozita më dobët se Kosova.

Nga rajoni, Maqedonia e Veriut gjendet më së miri – në vendin e 16-të me 7 pozita më lart se në muajin gusht për sa i përket internetit në telefon. Mirëpo, me internet “broadband” nuk i ka fare punët mirë, duke u renditur në pozitën 106./Klankosova/

Për ta parë listën e plotë, klikoni KËTU.