×
  • Lajme
  • Lajme

    Specialja ia vazhdon paraburgimin edhe Jakup Krasniqit

    Insajderi
    15 November 2023 - 14:59
    Klikoni Këtu për t'u bërë pjesë e kanalit të Insajderit në Youtube.

    Pas vazhdimit të paraburgimit për Rexhep Selimin, Dhomat e Specializuara të Kosovës (DhSK) në Hagë ia kanë vazhduar të njëjtën masë edhe Jakup Krasniqit.

    Vendimi për vazhdimin e masës së paraburgimit për Jakup Krasniqin është marrë nga kryetari i trupit gjykues, Charles Smith me 15 nëntor 2023.

    Sipas vendimit, gjatë parashtrimeve të veta me 25 tetor 2023, Zyra e Prokurorit të Specializuar ka kërkuar vazhdimin e masës së paraburgimit për Krasniqin pasi nuk ekziston ndonjë ndryshim i rrethanave që nga vendimi i kaluar.

    “ZPS kërkon vazhdimin e paraburgimit të z. Krasniqi. Ajo argumenton se: (i) në mungesë të ndonjë ndryshimi të rrethanave që nga vendimi i njëmbëdhjetë për paraburgim, paraburgimi i z. Krasniqi mbetet i nevojshëm dhe i arsyeshëm; dhe (ii) ecuria e vazhdueshme e gjykimit, dhe zbulimet e mëtejshme duke i dhënë z. Krasniqit qasje më të madhe në informacione në lidhje me dëshmitarët e ndjeshëm dhe rastin kundër tij, mbështesin domosdoshmërinë dhe arsyeshmërinë e paraburgimit të tij”, thuhet në vendimin për vazhdimin e masës së paraburgimit ndaj Jakup Krasniqit.

    Ndryshe nga ZPS-ja, mbrojtja e Krasniqit ka kërkuar lirimin e tij duke pohuar se tani tri vjet pas paraburgimit të tij fillestar, çdo rrezik i mbetur dhe i identifikuar nga Paneli është i pamjaftueshëm për të justifikuar vazhdimin e paraburgimit.

    “Mbrojtja e Krasniqit kërkon lirimin e menjëhershëm të z. Krasniqi, duke iu nënshtruar kushteve që Paneli i konsideron të përshtatshme. Ajo pohon se, në këtë moment kohor, tre vjet pas paraburgimit të tij fillestar, çdo rrezik i mbetur i identifikuar nga Paneli është i pamjaftueshëm për të justifikuar paraburgimin e vazhdueshëm të z. Krasniqi”, thuhet në vendim.

    Ndërsa në përgjigje të kësaj, ZPS-ja parashtron se kërkesa e mbrojtjes duhet të refuzohet dhe se Krasniqi duhet të qëndrojë në paraburgim.

    ZPS-ja në arsyetimin e kërkesës së saj për vazhdimin e paraburgimit pretendon se ekziston rreziku i arratisjes, pengimi i ecurisë procedurale dhe rreziku i kryerjes së krimeve të tjera nga Krasniqi.

    Pas shqyrtimit të kërkesave të ZPS-së dhe mbrojtjes së Krasniqit, Paneli i gjyqtarëve në krye me gjyqtarin Charles Smith III ka urdhëruar vazhdimin e paraburgimit për Jakup Krasniqin.

    Po ashtu, me anë të këtij vendimi është urdhëruar mbrojtja e Krasniqit që të dorëzoi një version publik të redaktuar të përgjigjes deri me 22 nëntor 2023 si dhe ka urdhëruar regjistrin që të riklasifikojë përgjigjen si publike.

    Sipas vendimit, Zyra e Prokurorit të Specializuar është udhëzuar që të paraqesë parashtresa për shqyrtimin e radhës të paraburgimit të  Krasniqit jo më vonë se 22 dhjetori 2023. Ndërsa, përgjigjet e mbrojtjes jo më larg se data 4 janar 2024. Në rast se ka  sërish kundërpërgjigje për mbrojtjen nga ZPS-ja, të dorëzohen jo më larg se 9 janari 2024.

    Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.  

    Më 29 prill 2022, Zyra e Prokurorit  të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

    Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

    Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020./BetimipërDrejtësi

    OP-ED
    Nga Rubrika

    © 2016-2024 Gazeta Online Insajderi - Të gjitha të drejtat e rezervuara.

    Impressum

    Kontakt

    Trademark