Klubi i natës “Venom” i cili ndodhet në Çagllavicë të Prishtinës, ka qenë cak i një sulmi me armë zjarri mbrëmjen e së dielës. Sulmi ndodhi rreth orës 23:09, jashtë orarit të punës së klubit.

Rastin e ka konfirmuar edhe zëdhënësi i Policisë, Agron Borovci derisa shtoi se janë duke punuar për zbardhjen e rastit. Ende nuk ka të arrestuar.

“Mbrëmë rreth orës 23:25, është raportuar për të shtëna me armë zjarri në drejtim të një objekti, në rrugën magjistrale Ferizaj – Prishtinë, respektivisht në fshatin Llapnasellë. Policia menjëherë ka dalë në vendin e ngjarjes dhe ka ndërmarrë të gjitha veprimet e nevojshme policore. Nuk është raportuar për persona të lënduar përveç dëmeve materiale. Aktualisht po vijon puna hetimore me qëllim identifikimin e personave të dyshuar të përfshirë në rastin në fjalë si dhe zbardhjen e plotë të rrethanave të kësaj ngjarjeje”, tha ai për Insajderin.

Për sulmin me armë ndaj “Venom”, Gazeta Insajderi ka folur me pronarin e klubit, Lekë Duhanaj i cili konfirmoi se biznesi i tij është sulmuar nga persona të pa njohur për atë.

Duke mos dhënë shumë detaje, Duhanaj u shpreh pavarësisht rastit mbrëmjet do të vazhdojnë të mbahen.

“Po është e vërtetë që ka ndodhë sulmi, ka ndodh rreth orës 23:09. Kemi marrë masa, ndonjë detaj të ri s’kemi. Policia është duke u marrë me rastin. Ndejat kanë me vazhdu me u mbajtë njësojë”, tha ai për Insajderin.

Lexo edhe: