Kandidati për deputet nga radhët e Aleancës për Ardhmërinë e Kosovës (AAK), Besnik Tahiri, ka thënë se gjatë detyres së tij zi zëvenëskryeministër kanë arritur të bënin shumë reforma, njëra ndër to edhe miratimi në Kuvend i pakos së reformave shtetërore.  

“Me këtë pako, ne kemi ndalë punësimin me të njohshëm. Ne, sot kemi vërtetuar se askush nuk mund të hyjë më një librezë partie në punë, por secili duhet t’i nënshtrohet konkursit të mbyllur përmes Ligjit për zyrtarët publikë”, ka shkruar Tahiri.

“Policët do të kenë paga mbi 700 euro; të gjithë specialistët do të kenë paga mbi 1.200 euro; të gjithë zjarrfikësit dhe të gjithë zyrtarët publikë do të kenë përgjithmonë një trajtim të veçantë”, ka shkruar ai.

Shkrimi i tij i plotë:

Gjatë punës sime në Qeveri, si në kapacitet të zëvendëskryeministrit të parë, po ashtu të shefit të reformave shtetërore, një ndër arritjet më të mëdha të Kosovës në administratën publike dhe në reformat shtetërore është miratimi në Kuvend i pakos së reformave shtetërore.

Me këtë pako, ne kemi ndalur punësimin me të njohshëm. Ne, sot kemi vërtetuar se askush nuk mund të hyjë më një librezë partie në punë, por secili duhet t’i nënshtrohet konkursit të mbyllur përmes Ligjit për zyrtarët publikë.

Po ashtu, me këtë iniciativë, në këtë pako të reformave, pas një periudhe të gjatë kohore 10-vjeçare, e kemi miratuar Ligjin për pagat, ligj i cili asnjëherë nuk është marrë për t’u shtyrë përpara, ligj i cili ka kaluar të gjitha procedurat e konsultimit dhe ka kaluar në Kuvend. Fatkeqësisht me vendim të Gjykatës Kushtetuese, disa nene të cilat nuk kanë qenë të propozuara nga unë, por kanë qenë të propozuara nga Kuvendi, Gjykata i ka hedhur poshtë. 

Megjithatë, ligji është gati, ligji është aty dhe me këtë ligj të gjithë policët do të kenë paga mbi 700 euro; të gjithë specialistët do të kenë paga mbi 1.200 euro; të gjithë zjarrfikësit dhe të gjithë zyrtarët publikë do të kenë përgjithmonë një trajtim të veçantë. Dhe mbi të gjitha, kemi ndalur padrejtësinë më të madhe, pabarazinë, që dikush të ketë pagë mijëra eurosh, e ai që kryen punë dhe ballafaqohet me qytetarët të ketë pagën më të ulët të mundshme.

Kjo vërteton seriozitetin, përkushtimin e Qeverisë së Haradinajt dhe të ekipit tim në krijimin e barazisë dhe krijimin e kushteve për zyrtarët publikë.