Kryesia e Këshillit Grevist në krye me Rrahman Jasharajn sot është takuar me kryetarin e LDK-së, Lumir Abdixhiku e pritet të takohet edhe me Memli Krasniqin e PDK-së. Këto takime nuk janë mirëpritur nga nënkryetari i Sindikatës së Infermierëve, Enlirat Duraku, shkruan Insajderi.
Duraku përmes një reagimi në Facebook, ka kërkuar nga Jasharaj që të mos t’i politizojë kërkesat e mësimdhënëseve.
“Përpjekja juaj duhet të fokusohet në promovimin e dialogut social dhe takimin me partnerin social, Qeverinë e Republikës së Kosovës”, ka thënë ai.
Reagimi i plotë:
O Rrahman Jashari,
Çfarë ke more burrë i dheut kështu !?
Mos e politizo një kërkesë të sinqertë të mësimdhënësve.
Mos e humb respektin dhe kredibilitetin.
Nuk i’a vlenë.
Çfarë dobie kanë këta mësimdhënës nëse ti takohesh me partitë politike ?
Përpjekja juaj duhet të fokusohet në promovimin e dialogut social dhe takimin me partnerin social, Qeverinë e Republikës së Kosovës.
Janë pikërisht këto veprime të cilat aktivitetit sindikal i japin konotacion negativ, duke i dhënë pretekst secilit që mendon që aktivitetet sindikale janë të instrumentalizuara dhe në favor të politikës e jo të atyre që me të drejtë kërkojnë kushte më të mira pune dhe mirëqenie më të mirë sociale dhe ekonomike.