KF Llapi i Tahir Batatinës ndodhet para një prej sfidave më të rëndësishme në historinë e klubit.

Dy ditë para ndeshjes së kthimit ndaj Buduçnostit në Prishtinë, trajneri llapjan ka dhënë detaje rreth mënyrës së organizimit, udhëtimit të tifozëve dhe biletave të shitura deri më tani për duelin e vlefshëm për rrethin e parë kualifikues të Ligës së Konferencës.

Prag-sfida është përcjell me tensione si pasojë e ngjarjeve të ndodhura në kryeqytetin malazez, ndeshje në të cilën tifozët vendas fyen në baza etnike futbollistët shqiptarë të Llapit.

Të njëjtit tifozë, të njohur me nofkën “Varvari”, kanë paralajmëruar se do të jenë prezent edhe në udhëtimin e klubit të tyre në Prishtinë.

Por, Tahir Batatina, i cili përveç se drejton skuadrën e Llapit është edhe përgjegjës në menaxhimin e klubit, ka thënë se nuk është i informuar zyrtarisht për udhëtimin e tifozëve mysafirë.

Për çdo rast, tekniku i Llapit u shpreh se është vlerësuar gjendja e sigurisë, si dhe janë marrë masat në këtë drejtim.

“Ende nuk kemi informatë zyrtare nëse ata (“Varvari”) do të jenë prezent apo jo, mirëpo Llapi i ka marr masat së bashku me institucionet e rendit për sigurinë e çdo qytetari, pa marr parasysh kush vjen”, tha Batatina për Paparacin.

Tifo-grupi malazez kishte provokuar ekipin e Llapit në ndeshjen e parë të zhvilluar në Mal të Zi, ndërsa provokimet e tyre ndaj shqiptarëve i kishin shfaqur edhe në faqen e tyre zyrtare, ku përmes një fotoje Kosovën e kishin shfaqur si pjesë të Serbisë.

Llapi ka filluar mobilizimin me tifo-grupet shqiptare për ndeshjen kthyese, ndërsa interesimi del të jetë i jashtëzakonshëm.

“Deri sot, në ora 09:00 kanë qenë të shitura 7 mijë bileta”, ka thënë Batatina për Paparacin.

Llapi e kishte humbur ndeshjen e parë ndaj Buduçnostit me rezultat 2:0, ndeshje kjo e vlefshme për rrethin e parë kualifikues për Ligën e Konferencës.

Ndërsa, ndeshja kthyese mes Llapit dhe Buduçnostit do të zhvillohet më 14 korrik në stadiumin “Fadil Vokrri” me fillim nga ora 20:00.