Manchester United, Bayern Munich dhe Atletico Madrid janë dy klubet e mëdha evropiane që e kanë refuzuar pjesëmarrjen në Superligën Evropiane.

Themelimi i kësaj lige të shkëputur nga UEFA e mori dritën e gjelbër sot nga Gjykata e Drejtësisë e Bashkimit Evropian, që vendosi kundër UEFA-s dhe FIFA-s për ta parandaluar formimin e saj.

Por, tash klubet kanë nisur t’i konfirmojnë qëndrimet e tyre të mëhershme.

“Pozicioni ynë nuk ka ndryshuar. Ne mbesim të vendosur totalisht në pjesëmarrjen e kompeticioneve të UEFA-s dhe me një bashkëpunim pozitiv me UEFA-n, Premierligën dhe klubet tjera për ta vazhduar zhvillimin e futbollit evropian”, kanë shkruar “Djajtë e Kuq” në njoftimin e tyre.

“Familja evropiane e futbollit nuk e do Superligën Evropiane. Gjermania, Franca, Anglia, Italia, Spanja (përpos Real Madridit e Barcelonës) etj, nuk e duan Superligën. Ne jemi në favor të mbrojtjes së familjes së futbollit evropian, duke i mbrojtur ligat nacionale dhe duke siguruar që kualifikimi në kompeticionet evropiane të arrihet në fushën e blertë pas paraqitjeve të çdo sezoni”, shkruajnë “Los Colchoneros”.

Gjithashtu, edhe Bayern Munichu ka dalë me komunikatë, duke e refuzuar pjesëmarrjen në këtë garë.

“Ne kemi marrë parasysh vendimin e Gjykatës Evropiane të Drejtësisë. Megjithatë, kjo nuk e ndryshon qëndrimin e FC Bayern dhe qëndrimin se një kompeticion i tillë do ta përfaqësonte një sulm ndaj rëndësisë së ligave kombëtare dhe të bazës së futbollit evropian. Bundesliga përbën themelin e FC Bayern, ashtu si të gjitha ligat kombëtare formojnë themelin e klubeve evropiane të futbollit. Prandaj, është detyra jonë dhe bindja jonë e thellë t’i forcojmë, jo t’i dobësojmë. Ne gjithashtu mbështesim garat evropiane të klubeve nën ombrellën e UEFA-s. Pra, edhe një herë është shumë e qartë: dera për Superligën Evropiane në FC Bayern mbetet e mbyllur.”, shkroi gjiganti bavarez. /Express/