Gazetari Valon Syla përmes avokatit të tij, në fjalën përfundimtare në gjykatë ka kërkuar 30 mijë euro dëmshpërblim nga tre të akuzuarit për sulmin që kishte ndodhur tij në një kafiteri të Prishtinës.

Të akuzuarit janë Lum Dervishi, Kenan Hasani dhe Okan Hasani.

“Në përputhje me ligjin, pala e dëmtuar propozon që me rastin e vendosjes për aktakuzën të vendos edhe për kërkesën pasurore juridike për të dëmtuarin e cila në këtë rast propozon që të jetë në shumën prej 30 mije euro”, deklaroi avokati Kushtrim Palushi.

Kjo shumë e të hollave u kërkua në emër të shkaktimit të pasojave nga të dëmtuarit gjatë sulmit, shqetësimet që i kanë shkaktuar nga sulmi si të dëmtuarit, ashtu edhe familjarëve të tij.

Këtë propozim të avokatit e përkrahu edhe gazetari Valon Syla.

Avokati Kushtrim Palushi tutje shtoi se nga provat e administruara dhe të propozuara në aktakuzë do të vërtetohet se tre të akuzuarit e kanë kryer veprën penale duke marrë për bazë që të njëjtit edhe e kanë pranuar sulmin por që motivet nuk i kanë pranuar.

“Gjykata duhet të ketë parasysh këto rrethana rënduese si dhe faktin se sulme të tilla ndaj gazetarëve janë një fenomen në rritje e sipër”, tha avokati.