Partia në pushtet, Lëvizja Vetëvendosje është duke vazhduar me avazin e punësimit të njerëzve të saj në pozita udhëheqëse, së fundmi është kapur edhe një ndërmarrje.

Ish-kryetari i degës së Lëvizjes Vetëvendosje në Mitrovicë njëherit aktivisti i kësaj partie, Faruk Mujku është emëruar Kryeshef Ekzekutvi i Ndërmarrjes Hidroekonomike “Ibër Lepenci”.

Gazeta Insajderi ka arritur të sigurojë vendimin ku shihet se Mujku nga 6 dhjetori e tutje do të udhëheq me këtë ndërmarrje. Këtë pozitë do ta ushtrojë për 3 vite me mundësi vazhdimi.

Faruk Mujku ka qenë edhe kandidatë i Lëvizjes Vetëvendosje për garën në Mitrovicë e Jugut, mirëpo pas humbjes në zgjedhjet e 17 tetorit të 2021-ës, ai ka dhënë dorëheqje nga pozita e kryetarit të degës së Vetëvendosjes në këtë komunë.

Në postimin e tij ku njoftonte për dorëheqje, ai ka theksuar se do të vazhdojë të jetë aktivist i LVV-së, e besnikëria ndaj partisë iu shpërblye me postin e Kryeshef Ekzekutvi i Ndërmarrjes Hidroekonomike “Ibër Lepenci”.

“Unë kam dhënë dorëheqje nga të qenurit Kryetar por asnjëherë nga të qenurit aktivist dhe ti lejoj oportunistët e matrapazët të shfrytëzojnë ditët e vështira të Lëvizjes dhe për ta shkatërruar atë plotësisht nga brenda“, shkruante ai përcjell Insajderi.

Për një kohë, Mujku ka ushtruar postin e nënkryetari të Komunës së Mitrovicës.

Pak ditë më parë Gazeta Insajderi kishte raportuar për procesin e emërimit të Kryeshefit Ekzekutiv në Ndërmarrjen “Ibër-Lepenci”.

Numrin dy në listën e ngushtë siç raportoi Insajderi e mbante një njeri i afërt me Lëvizjen Vetëvendosje të Albin Kurtit. Bëhej fjalë, pikërisht për Faruk Mujkun i cili pas intervistimit kishte arritur të marrë 60 pikë për pozitën e Kryeshefit të “Ibër-Lepenc”-it, e kurse sot veç është emëruar në këtë pozitë.

Cili është roli i “Ibër-Lepenc”-it?

Ndërmarrja Hidroekonomike “Ibër-Lepenc” Sh. A. me seli në Prishtinë është ndërmarrje shumëfunksionale e cila furnizon industrinë, ujësjellësit dhe bujqësinë me ujë të papërpunuar si dhe prodhon energji elektrike nga Hidrocentrali i Ujmanit.

Ajo është themeluar me Vendimin e Kuvendit të Kosovës me 28 Shkurt 1967, ndërkaq që nga pas lufta  është transformuar në Ndërmarrje Publike N.H. “Ibër-Lepenc” nga UNMIK-u.

Pas Korporatizimit të Ndërrmarjes, më 01 janar 2008, ndërmarrja është shndërruar në Ndërrmarje Hidro-Ekonomike “Ibër-Lepenc” Sh. A.

Ndërmarrja është Shoqëri Aksionare në pronësi 100% të Qeverisë së Kosovës./Gazeta Insajderi