Ka vdekur në moshën 63-vjeçare shkrimtari, dramaturgu, publicisti dhe profesori shumëvjeçar, Haqif Mulliqi.
Lajmin e ka bërë me dije vajza e tij, Getoarba Mulliqi.
“Babi na la. Dashnise tone ma te madhe iu ndalen dhimbjet, per me na fillu neve dhimbja e perjetshme. Per detajet e ceremonise, ju njoftojme me vone”, ka njoftuar ajo.
Veprimtarinë e tij si gazetar e kishte filluar në gazetën “Bota e Re” (1983 – 1990), duke vazhduar në gazetën “Fokus” në Kroaci (1992), gazetën “Potlet” në Zagreb (1988 -1991), e më pastaj edhe si redaktor e korrespodent edhe në shumë gazeta e revista të tjera vendore dhe ndërkombëtare.
Mulliqi gjithashtu ishte profesor në Universitetin e Prishtinës, në Fakultetin e Filologjisë në Departamentin e Gazetarisë, si dhe në Fakultetin e Arteve.
Ai la pas vetes një krijimtari të gjerë në gazetari, publicistikë e dramaturgji. Gjithashtu, kontribut të jashtëzakonshëm, Mulliqi ka dhënë gjatë viteve 1998-99, në raportimin gjatë luftës në Kosovë.