Me 29 dhjetor të 2023-tës, Kryeshefi Ekzekutiv i KRU ‘Prishtina’ ka marrë vendim që ta lirojë nga pozita e Ushtruesit të Detyrës së Drejtorit Teknik në KRU ‘Prishtina’, Sokol Xhafën.

Në vendimin e KRU ‘Prishtina’ thuhet se njëra prej arsyeve të lirimit nga detyra e Sokol Xhafës është vlera e lartë e manganit në liqenin e Badovcit, pasi sipas tyre Xhafa propozoi “zgjidhje imagjinare dhe të pamundura teknikisht”.

Tutje Xhafa nuk ka treguar përformancën e duhur dhe mosveprimet e tij kanë ndikuar që ndërmarrja të ketë ngecje, thuhet në vendimin për shkarkimin e tij.

Gazeta Insajderi ka kontaktuar me ish Ushtruesin e Detyrës së Drejtorit Teknik në KRU ‘Prishtina’, Sokol Xhafën, i cili e ka quajtur vendim skandaloz dhe të pa ligjshëm, lirimin e tij nga kjo pozitë.

“Sigurisht vendimi është skandaloz, arbitrar e i pa ligjshëm, dhe të gjitha pikat që janë listuar do ti kundërshtoj me fakte e argumente. E vërteta është krejt ndryshe”, tha Xhafa në një prononcim për Insajderin.