Dy zëvendësministrave të Qeverisë Kurti iu janë ndryshuar dikasteret. Avni Zogiani dhe Resul Makreshi do të kenë pozita të reja në ekzekutiv, shkruan Insajderi.
Nga nesër Zogiani do të jetë zëvendësministër i Financave ndërsa Makreshi zëvendësministër në MINT.
Kjo është bërë e ditur përmes komunikatës të lëshuar për media nga Zyra e Kryeministrit.
“Kryeministri i Republikës së Kosovës, Albin Kurti, ka ngarkuar me përgjegjësi dhe detyra të reja dy zëvendësministra të Qeverisë, të cilët i ka uruar për pozitën e re dhe dëshiruar suksese në punën dhe angazhimin e tyre”, thuhet në njoftim.
“Ish-zëvendësministri i Mjedisit, Planifikimit Hapësinor dhe Infrastrukturës, Avni Zogiani është emëruar zëvendësministër i Financave, Punës dhe Transfereve. Ndërsa, ish-zëvendësministri i Financave, Punës dhe Transfereve, Resul Makreshi, është emëruar zëvendësministër i Industrisë, Ndërmarrësisë dhe Tregtisë”, sqaron kryeministria.
Në komunikatë nuk është bërë e ditur pse është bërë ky ndryshim./Insajderi