Shefja e re e Zyrës së Këshillit të Evropës në Prishtinë, Mary Ann Hennesy, e cila këto dite ka filluar detyrën në këtë pozitë, ka qëndruar për vizitë sot në Kosovë dhe është takuar me zëvendësministrin e Jashtëm, Kreshnik Ahmetin.

Në njoftimin e Ministrisë së Punëve të Jashtme dhe Diasporës thuhet se Hennesey shprehu përgëzimin për institucionet e Kosovës për implementimin e vendimit të Gjykatës Kushtetuese në lidhje me pronat e Manastirit të Deçanit, duke shtuar se ky është sinjal dhe mesazh i fuqishëm që Kosova është e gatshme t’i bashkohet Këshillit të Evropës, si institucion i cili ndër të tjerash ka fushëveprim edhe sundimin e ligjit.

Tutje, Hennesey ofroi gatishmërinë e saj për bashkëpunim të plotë dhe shtyrjen përpara të projekteve konkrete e që janë në fushëveprim dhe mandat të kësaj zyre.

Ahmeti, më tej duke theksuar rëndësinë e jashtëzakonshme të anëtarësimit të Republikës së Kosovës në Këshill të Evropës, njoftoi në lidhje me hapat pozitive që ka ndërmarrë Republika e Kosovës në plotësimin e para kushteve të ngritura nga raportuesit.