Në përkujtim të kontributit të jashtëzakonshëm të akademikut Shyqri Nimani në botën e artit dhe kulturës, Galeria Kombëtare e Kosovës po shfaqë një përzgjedhje të veprave të tij nga arkivi dhe koleksioni i GKK-së.

Ju ftojmë të vizitoni këtë kënd të veçantë që shpalosë trashëgiminë e shquar të një vizionari të vërtetë që i kushtoi 10 vite GKK-së si drejtori i saj i parë.

Shyqri Nimani (1941-2023) ishte piktor, dizenjues grafik dhe pedagog shqiptar. Është i mirënjohur nëpër hapësirat shqiptare për kaligrafimin me dorë në pergamen të Deklaratës së Shpalljes së Pavarësisë së Kosovës në vitin 2008.

Ai ishte profesor i rregullt në Fakultetin e Arteve të Prishtinës. Në vitet 1976 – 1978 ka qëndruar në Japoni si bursist i qeverisë japoneze për hulumtim artistik. Në vitet 1979 – 1989 ka qenë drejtor i Galerisë së Arteve të Kosovës. Ka qenë dekan i Fakultetit të Arteve nga viti 1991 – 1994. Merrej me pikturë, grafikë, dizajn dhe me disiplina të tjera të arteve figurative. Ka botuar monografi për artin mesjetar dhe bashkëkohor shqiptar. Ka përkthyer edhe libra nga gjuhë të huaja.