Sot në Komisionin për Buxhet, raportoi Guvernatori i BQK-së, Fehmi Mehmeti i cili tha se nuk ka pasur rritje ekonomike 4.9 për qind, ashtu siç kishte deklaruar kryeministri Kurti e ministri i Financave, Hekuran Murati.
Pas kësaj deklarate, ka reaguar zëdhënësi i Qeverisë, Përparim Kryeziu i cili tha se Kurti ka deklaruar për tremujorin e parë të vitit 2022, ndërsa Guvernatori për projeksionin e rritjes ekonomike për gjithë vitin 2022.
Tutje, Kryeziu ka thënë se nuk ka përgënjeshtrim por ka rritje ekonomike.
Postimi i plotë i Kryeziut:
Reagim ndaj lajmit me titull, “BQK përgënjeshtron Kurtin e Muratin: Nuk pati rritje ekonomike 4.9 për qind”
Një deklarim i guvernatorit të BQK-së në komisionin parlamentar për Buxhet dhe Financa po përdoret sot pasaktësisht si kinse përgënjeshtrim i deklaratave të kryeministrit Kurti dhe ministrit Murati.
Kryeministri Kurti në deklarimet e tij, e së fundmi në postimin me rastin e shënimit të 18-mujorit të Qeverisë, i është referuar të dhënave të Agjencisë Kosovare të Statistikave për tremujorin e parë të vitit 2022, sipas së cilave rritja ekonomike për tre muajt e parë të vitit është 4.9%. Citati nga postimi i kryeministrit: “Ndërkaq, në çerekun e parë të këtij viti patëm 4.9% rritje ekonomike”.
Ndërkaq, në raportimin e guvernatorit në këtë komision, ai i thotë se projeksionet e BQK-së janë se rritja ekonomike për vitin 2022 do të jetë 3.7%.
Pra, guvernatori flet për projeksionin e rritjes ekonomike për gjithë vitin 2022 sipas projeksioneve të BQK-së, ndërkaq kryeministri Kurti ka folur për shifrat reale të rritjes në 3 mujorin e parë të vitit 2022. Nuk ka përgënjeshtrim. Ka rritje ekonomike.