Komuna e Prishtinës ka përpiluar një raport financiar për tre mujorin e parë të këtij viti.
Në këtë raport që e posedon ekskluzivisht Gazeta Insajderi janë specifikuar me detaje secili detaj i shpenzimeve, të hyrave dhe çështjeve të tjera financiare nga komuna.
Të hyrat vetanake të Komunës gjatë tremujorit të parë, kanë shënuar rënie prej 34.93% krahasuar me periudhën e njëjtë të vitit paraprak.
Kjo rënie ka qenë kryesisht e shtyrë nga të hyrat e tatimit në pronë, të hyrat nga inspeksioni, taksa për certifikata dhe dokumente zyrtare. Në trendin negativ të të hyrave kanë ndikuar vendimi i Kuvendit Komunal për faljen e tatimit në pronë, për qytetarët e Komunës së Prishtinës në shumë maksimale prej: 75.00 €.
Ajo që bie në sy është implementimi i projekteve të parapara. Në shumicën e projekteve, tek kolona se sa për qind është realizuar buxheti dhe rrjedhimisht pasi të përfundojë (projekti) zyrtarisht duhet të bëhet pagesa.
Për projekte të caktuara, ani se është ndarë buxheti, implementimi i tyre nuk ka arritur të bëhet.
Pjesa më e madhe e drejtorive ka dalur me 0 progres në implementim të tërësishëm të projekteve.
Disa nga to për qindja ka qenë pak më e lartë, por jo edhe shumë e madhe.
Drejtoria e Investimeve Kapitale ka arritur vetëm 1.51% ta bëjë kryerjen e projekteve/planeve që i kanë bërë për këtë vit.
Situatë e njëjtë është edhe në Drejtorinë e Parqeve.
Zerot e Përparim Ramës për tre mujorin e parë janë edhe në drejtoritë: E bujqësisë, Planifikimit dhe Drejtoria e Sigurisë dhe Emergjencave.
Po ashtu edhe në Drejtorinë e Shëndetësisë, Drejtorinë e Shërbimeve Sociale dhe Drejtorinë e Shërbimeve Publike.
3.13% është realizimi i buxhetit në Drejtorinë e Arsimit.
Situatë më e mirë është në Drejtorinë e Infrastrukturës Publike. Në këtë drejtori ka pasur progress në kryerje të qëllimeve në për qindje prej 21.65.
/Insajderi.org/