Zëvendëskryeministri kosovar, Enver Hoxhaj e ka cilësuar të rëndësishëm anëtarësimin e kompanisë nga Kosova, Meridian Coorporation, në Forumin Botëror Ekonomik (WEF).

Hoxhaj, përmes një shkrimi në rrjetin social Twitter, ka thënë se është në të mirë të shtetit të Kosovës anëtarësimi i Meridian Coorporation në Forumin Botëror Ekonomik.

“Ndihem mirë kur shoh koorporatat e Kosovës që integrohen në organizata të rëndësishme ndërkombëtare, si Meridian Coorporation e cila është bërë anëtarja e parë nga Kosova e Forumit Botëror Ekonomik! Punë të mbarë dhe paqi fat!”, shkroi Hoxhaj të hënën, kur edhe u kumtua lajmi i anëtarësimit të Meridian në WEF.

Njëra ndër kompanitë më të vjetra private dhe më të mirënjohura në Kosovë, Meridian Corporation, u pranua të hënën si anëtare e Forumit Ekonomik Botëror, me seli në Gjenevë, Zvicër.

Meridian Corporation është kompania e vetme kosovare e cila do ta përfaqësojë vendin tonë në FEB, ndërsa anëtarësimi i saj në Forumin Botëror Ekonomik vjen si mirënjohje për rolin dhe kontributin e kompanisë në përmirësimin e ambientit ekonomik dhe social në vendin tonë.

E themeluar 26 vjet më parë, Meridian Corporation është kompani distribuimi e cila ka fokus të veçantë  sektorin e ushqimit dhe pijeve. Në kuadër të Meridian Group janë edhe njësitë e suksesshme të biznesit sikurse rrjeti i marketeve Meridian Express, Meridian Kitchen dhe Buka Bakery.