Policia e Kosovës ka njoftuar se janë arrestuar katër persona nën dyshimin se ishin të përfshirë në një rrahje ndaj një personi tjetër në rajonin e Pejës.

Ky arrestim vie pas pamjeve të dhunës brutale të një grupi personave ndaj një personi tjetër janë publikuar në media. Në videon e publikuar në rrjetet sociale shihet se si një grup prej disa personave e rrahin pamëshirshëm një person tjetër në Pejë.

Policia ka arritur t’i arrestojë katër të dyshuarit: L.M(2003), T.M (2005), S.B (2007), E.A (2008).

Sipas Policisë, rasti ishte raportuar në Polici më datën 07.10 2022 rreth orës 12:20.

“Pas intervistimit, me urdhër Prokurorit kompetent tre të dyshuarve me numër rendor (1, 2 dhe 3) iu është caktuar masa e ndalimit, përderisa i dyshuari i katërt i mitur (nr. 4) është liruar në procedurë të rregullt”, thuhet në komunikatën e PK’së.

Përveç rrahjes, të dyshuarit edhe e kërcënojnë dhe poshtërojnë viktimën me fjalë të ndryshme.

“10 sekonda i ki afat me ik, nëse nuk ik për 10 sekonda, kam me ta shprazë karikatorin në kry” – dëgjohet në videon e publikuar.