Sekretari i Përgjithshëm i Ministrisë së Infrastrukturës, Izedin Bytyqi është rikther në punë një ditë pas shkarkimit nga pozita.

Ministria e Punëve të Brendshme dhe Administratës Publike (MPBAP), e udhëhequr nga ministri në largim Agim Veliu, ka anuluar vendimin e Ministrisë së Infrastrukturës (MI) për shkarkimin e Bytyqit.

Në një vendim të nxjerrë sot, MPBAP-ja e ka konsideruar të kundërligjshëm vendimin e nxjerrë të hënën të MI-së për shkarkimin e Bytyqit nga pozita e Sekretarit të Përgjithshëm, ka mësuar Gazeta Insajderi nga burime brenda qeverisë.

Vendimi të cilin e ka nënshkruar Agim Veliu detyron dikasterin e udhëhequr nga Arban Abrashi që ta rikthejë të njëjtën pozitë Izedin Bytyqin.

Dokumentin për shkarkimin e Bytyqit nga pozita e sekretarit e nënshkroi ministri në largim, Arban Abrashi.

Përmes vendimit, Abrashi obligoi të hënën Zyrën e Sekretarit të Përgjithshëm që sekretari i shkarkuar të sistemohej në pozitë si “drejtor departamenti” në kuadër të Ministrisë së Infrastrukturës.

Izedin Bytyqi është i afërt me Besnik Mustafën, djalin e Isa Mustafës, kryetarit në largim të Lidhjes Demokratike të Kosovës.

Para se të emërohej sekretar në MI, Bytyqi ka mbajtur pozitën e njëjtë edhe në Ministrinë e Punës dhe Mirëqenies Sociale, në kohën kur ministria udhëhiqej nga Abrashi.

Asokohe, si sekretar në Ministrinë e Punës, Bytyqi dyshohet se nga kjo pozitë kishte ndikuar në punësimin e resë së Isa Mustafës.

Edita Bajrami, gruaja e Besnikut, djalit të ish-kryeministrit Isa Mustafa ishte angazhuar si eksperte për të ndihmuar Ministrinë e Punës dhe Mirëqenies Sociale në rishikimin e Strategjisë Sektoriale.

Angazhimin e resë së ish-kryeministrit e pati konfirmuar po Izedin Bytyçi, ish-sekretari në MPMS, në vitin 2017.