Gazetari dhe opinionisti, Berat Buzhala, ka reaguar ndaj kryetarit të Federatës së Futbollit të Kosovës (FFK), Agim Ademi pas raportimeve të fundit në media se ai nuk e ka dërguar certifikatën e kërkuar nga Komisioni Vlerësues i Ministrisë së Sportit se nuk është nën hetime.

Buzhala në një postim në Facebook ka thënë se presidenti i FFK’së duke u munduar të fsheh ‘krimin’ e tij është afër t’i kryejë edhe dhjetë të tjera.

Teksa, ka theksuar se i pari i FFK’së nuk është i denjë për pozitën që e ka sepse në atë pozitë duhet të jetë ndonjë person që është shembull për të mirë dhe që nuk ”mashtron”.

”Agim Ademi, tuj u mundu me e mshefe nje krim, don me i kry edhe 10 tjera. Federata e Futbollit te Kosoves ka nevoje per nje kryetar qe ka karakter, qe ka dinjitet, qe nuk rren e nuk mashtron. Kryetari i Federates duhet me kane shembull – per te mire,” ka shkruar ai.

Sot gjatë ditës Agim Ademi publikoi në Facebook një certifikatë të lëshuar nga gjykata Themelore e Prishtinës, me të cilën dëshmon që ai nuk është nën hetime.

Megjithatë, pastaj u raportua se certifikata e lëshuar ka të dhëna të mangëta pasi që në certifikatën e publikuar nga Ademi është e plotësuar vetëm pika ku tregohet se ai nuk është i dënuar. Por jo edhe dy pikat ku kërkohet të dihet nëse ai është në procedurë penale apo jo, gjë që e bën këtë dokument të paplotësuar në tërësi.