Deputeti i PDK-së, Bekim Haxhiu, ka deklaruar se sot i ka propozuar kryetarit të Kuvendit, Glauk Konjufca, që ta hedhë në votim shpërbërjen e Kuvendit pas mungesës së kuorumit në seancën e sotme.
Haxhiu tha se kjo mungesë e kuorumit vjen nga papërgjegjësia e deputetëve të zgjedhur të LVV-së.
“Qytetarët votuan 51% për ndryshim, për zhvillim, ndërsa këta çdo ditë po ofrojnë dështim dhe keqmenaxhim. Kauzat me të cilat bënë fushatë u shkelën e premtimet u tretën. Mungesa e kuorumit në seancë parlamentare vjen nga papërgjegjësia e deputetëve të zgjedhur të LVV-së. Sot, pas dështimit të dytë të seancës së Kuvendit në mungesë kuorum, i propozova kryetarit të Kuvendit z.Glauk Konjufca që ta hedhë në votim shpërbërjen e Kuvendit”, tha ai përmes një postimi në rrjetin social Facebook.