Xhudistja Distria Krasniqi ka fituar medaljen e artë për Kosovën në Lojërat Mesdhetare që janë duke u zhvilluar në Algjeri, shkruan Insajderi.

Krasniqi sapo ka përfunduar luftën e saj me kundërshtaren Ana Puljiz nga Kroacia.

Distria pa shumë mund arriti që t’ia fitojë Kosovës medaljen e parë në këto lojëra që po mbahen në Oran të Algjerisë.

Krasniqi triumfoi me IPPON ndaj kroates në kategorinë deri në 52 kilogramë.

Si bartëse e parë, Distria ishte e lirë në xhiron e parë. Në xhiron e dytë, përkatësisht në çerekfinale e mposhti qiprioten Sofia Asvesta.

Ndërkohë në gjysmëfinale e kaloi spanjollen Ana Perez Box.

Ndaj të dyjave realizoi herët “Waza-ari” dhe më pas kontrolloi luftën deri në fund. Nuk u rrezikua për asnjë moment. /Insajderi/