34-vjeçari Nejat Ozcelik i cili jeton në Stamboll ka mësuar se ai është regjistruar si i vdekur për shkak të ngjashmërisë së emrit dhe mbiemrit me të afërmin e tij, Necat Ozcelik, i cili ka vdekur më 9 shkurt si pasojë e tërmetit në Turqi.

Atij iu tha se figuronte si i vdekur në regjistrat e popullsisë gjatë një kontrolli trafiku që iu bë. Ozcelik është tronditur nga ky informacion dhe ka shkuar në stacion policor për ta qartësuar.

Identiteti i Nejat Ozcelikut u konfirmua përmes shenjave të gishtave në polici. U kuptua se ishte gabim në regjistra për shkak të ngjashmërisë së emrave.

Kur Ozcelik tentoi të shikonte llogarinë e tij bankare, ai u përball me pengesa në qasje. Të dhënat nuk i pranoheshin edhe pse ishte deklaruar tashmë se ishte gjallë.

Atij iu është thënë se duhet të bëjë ankesë. I gjendur në këtë situatë për 11 ditë që nga vdekja e Necatit, Nejati do që ky problem të rregullohet dhe ta vazhdojë jetën e tij.

“Shkova në Drejtorinë për Regjistrimin e Popullsisë dhe bëra ankesë. Dërgova dokumentet që dëshmonin se jam gjallë. Por, nuk u zgjidh. Jam sëmurë, por nuk mund të shkoj në spital. Nuk mund të kryej transaksione sepse nuk kam qasje në bankë. Jam viktimë sepse jam i vdekur kudo që shkoj. Dua që kjo të zgjidhjet sa më shpejt”, ka thënë ai, raportoi CNNTurk.