Dy ditë pas rastit të dhunës ndaj të moshuarës në shtëpinë e pleqëve “Orenda” në Pejë, është mbajtur protestë në qytetin e Gjakovës e thirrur nga organizata “Krimet e Luftës” e cila po mbahet në mbështetje të së moshuarës, e cila është nëna e dëshmorit, Taulant Nura.

Gjatë protestës ka folur e bija e të moshuarës e cila u keqtrajtua nga një infermiere dhe dy të tjerat përqesheshin dhe i bënin videon, e cila tha se, “Nana nuk më ka vetëm mua, Zhanetën, Milotin e Taulantin, por ju paska të gjithë juve”.

Tutje e bija e të moshuarës ka kërkuar drejtësi dhe vetëdijësim nga institucionet.

“Të gjitha u thanë. Për Taulantin, nanën dhe familjen. Ju kisha lut të ketë drejtësi dhe vetëdijësim nga të gjitha institucionet… Nana nuk më ka vetëm mua, Zhanetën, Milotin e Taulantin por ju paska të gjithë juve”.

Derisa, Gjykata Themelore e Pejës lidhur me rastin e sulmit ndaj Minirie Nurës në shtëpinë e pleqve “Orenda” në Pejë, ka marrë vendimin që tri infermierët e përfshira në pamjet e publikuara të ndalohen në paraburgim me nga një muaj.

Infermieret e ndaluara janë, Aurona Pelaj, autore e dhunës, Altina Rexhepi dhe Remzie Kuqi që kanë filmuar episodin e tmerrshëm dhe nuk kanë ndërhyrë.

Kujtojmë se para dy dite, në disa pamje të publikuara në rrjete sociale, shihej infermierja Pelaj duke e goditur me shpulakë e shqelma të moshuarën.