Policia e Kosovës ka angazhuar personel shtesë në pikat kufitare mes Kosovës dhe Serbisë për ta menaxhuar fluksin e qytetarëve, të cilët ia kanë mësyr shtetit fqinj për të votuar në zgjedhjet lokale dhe ato parlamentare.

Serbët e Kosovës kanë udhëtuar në mënyrë të organizuar drejt Serbisë për të ushtruar të drejtën e votës.

Gjithashtu edhe Komuna e Gjilanit ka organizuar transport për qytetarët e Luginës që punojnë në Gjilan, në mënyrë që ata ta ushtrojnë të drejtën e votës.

“Policia e Kosovës ka ndërmarrë veprimet e duhura në mënyrë që liria e lëvizjes të jetë e garantuar. Po ashtu policia edhe në pikat e kalimit kufitar ka ndërmarrë hapa konkret përfshirë edhe shtimin e personelit policorë për të përballuar më shumë kalime kufitare se ditëve të tjera.”

“Për shkak të fluksit të qytetarëve dhe procedurave kufitare, ka ndikuar në krijimin e disa pritjeve të kalimit kufitar në disa pikë kalime kufitare që lidhin Republikën e Kosovës me Serbin, ku për të shmangur këto pritje Policia e Kosovës ka angazhuar personel shtesë, në mënyrë që të kemi një menaxhim sa më efikas të kufijve shtetëror ashtu siç parashihet edhe me MIK, (menaxhimi i integruar i kufirit)”, thuhet nga Policia e Kosovës.

Në pikat kufitare Jarinje, Dheu i Bardhë, Bërnjak, Merdar e Muçibabë ishin krijuar kolona të gjata.