FC Ballkani pak minuta më parë kuptoi kundërshtarin e parë që do të ketë në rrethin eliminator të Ligës së Kampionëve. Klubi kampion i Kosovës për kundërshtar do ta ketë kampionin e Lituanisë, Zalgiris Vilinius, shkruan Insajderi.

Emocionet e shortit, skuadra e Ballkanit i përjetuan së bashku pasi ishin grumbulluar e gjithë skuadra me stafin, për ta përcjell shortin që ishte duke i hedhur në Nyon të Zvicrës.

Pasi zyrtari i UEFA-s, zbuloi emrin e kundërshtarit të Ballkanit, gjithë skuadra filloi festën të cilës i printe trajneri Ilir Daja.

Festa e tyre u transmetua direkt në faqen zyrtare të klubit, madje u dëgjuan edhe disa sharje të rënda.

Kjo video tashmë është larguar nga faqja disa minuta pasi përfundoi transmetimi direkt i shortit.

Në hedhjen shortit në Nyon, si përfaqësues i klubit ka marrë pjesë presidenti Arsim Kabashi.

Ndeshjen e parë do ta zhvillojë si vendës më 5 ose 6 korrik, ndërsa si mysafir më 12 ose 13 korrik.

Shorti është hedhur në Nyon të Zvicrës, që përcaktoi çiftet e raundit të parë eliminator të Ligës së Kampionëve për sezonin 2022-2023.

Klubi nga Suhareka do të marrë pjesë për herë të parë në gara evropiane pas shpalljes kampion i Superligës së Kosovës në futboll. /Insajderi/