Ministri i Punëve të Brendshme, Xhelal Sveçla ka përgëzuar Policinë e Kosovës dhe Prokurorinë për aksionin Brezovica, ku protagonist është dhëndrri i Liburn Aliut, Berat Lahu. Nuk dihet nëse Sveçla ka harruar apo nuk mërzitet që ndër të arrestuarit për rastin Brezovica është i afërm i bashkëpartiakut të tij.
Përmes një statusi në rrjetin social, Facebook, Ministri Sveçla përgëzoi institucionet për luftën e pa kompromis ndaj krimit.
“Përgëzoj Policinë e Kosovës, Prokurorinë dhe të gjitha institucionet tjera për realizimin e suksesshëm të aksionit të radhës në luftën e pa kompromis ndaj krimit, korrupsionit dhe keqpërdorimit të detyrës zyrtare, në aksionin ‘Brezovica’ pas vlerësimit të raporteve nga Drejtoria për Hetimin e Krimeve të Rënda në Prishtinë, Agjencia Kadastrale e Kosovës dhe Agjencia për Mbrojtjen e Mjedisit të Kosovës” – shkroi Sveçla.
Ministri ndër tjerash paralajmëroi që lufta ndaj zhvatësve të pasurisë publike do të vazhdojë edhe në ditët e ardhshme.
“Lufta jonë ndaj krimit, korrupsionit dhe zhvatësve të pasurisë publike do të vazhdojë edhe në ditët e ardhshme me të gjitha angazhimet e plota të organizmave tanë institucional në mbrojtjen efektive të së përbashkët“- shkroi tutje Sveçla.
Asamblist i Lëvizjes Vetëvendosje në Komunën e Prishtinës, Berat Lahu u arrestua me datë 21 shtator pas një operacioni që lidhet me rastin “Brezovica”. Dy ditë më vonë, Lahu u suspendua edhe nga anëtarësia në Lëvizjen Vetëvendosje. Lajmin e kishte bërë të ditur Vetëvendosje, e cila ka thënë se deri në zbardhjen përfundimtare të këtyre pretendimeve, Berat Lahut i suspendohet anëtarësia.
Berat Lahu, dhëndri i Liburn Aliut, si drejtor i KEDS-it për distriktin e Ferizajt, dyshohet se ka fituar si dhuratë një tokë në vlerën e 20 mijë eurove, në këmbim të lidhjes së rrjetit të energjisë për vilat që po ndërtoheshin në zonën e mbrojtur me ligj në Brezovicë.
Lahu sipas dosjes së Prokurorisë që e kishte siguruar Gazeta Insajderi, ka kërkuar ryshfet në shumën prej 60 mijë eurove për të ndikuar tek zyrët e KEDS në Prishtinë. Me këto dy veprimi Lahu dyshohet se ka kryer vepren penale “Pranimi i paarsyeshëm i dhuratave” dhe “Ushtrimi i ndikimit”
Sipas Kodit Penal të Republikës së Kosovës, vepra penale “Ushtrim i ndikimit” mund të dënohet me gjobë dhe me burgim prej një deri në tetë vjet.