Deputeti i Lidhjes Demokratike të Kosovës, Avdullah Hoti, nuk është shprehur optimist për ndonjë rezultat pozitiv në takimin e nesërm në Bruksel mes kryeministrit të Kosovës, Albin Kurti dhe Presidentit të Serbisë, Aleksandar Vuçiq.
Hoti tha se në këtë takim negociohet vetëm për “zbatimin e Marrëveshjes së arritur në villat e Titos në Ohër”.
Sipas tij, në Bruksel nuk do të diskutohet njohja reciproke, pasi thotë se Kosova ka hequr dorë nga kjo.
“Të jemi të qartë e të mos kemi pritje jorealiste për takimin e nesërm për dialog në Bruksel: Nesër negociohet vetëm për zbatimin e Marrëveshjes së arritur në villat e Titos në Ohër”.
“Nuk negociohet për njohje reciproke, pasi Kosova ka hequr dorë nga njohja reciproke si kompromis për të arritur Marrëveshjen e Ohrit. Bërjen e këtij kompromisi e dëshmoi vetë kryenegociatori i Kosovës para disa dite në media të huaja”, shkroi Hoti në Facebook.