Ish-deputeti në Maqedoninë e Veriut, Ruzhdi Matoshi nga sot i është bashkuar AAK-së.

Lajmin e ka bërë të ditur lideri i AAK-së, Ramush Haradinaj i cili tha se si do të jetë vlerë e shtuar në listën e tyre.

“Për Aleancën do të garojë edhe Prof. Dr. Ruzhdi Matoshi, njeri me integritet dhe përvojë të pasur politike. Ai ka shërbyer si deputet, për dy mandate në Kuvendin e Maqedonisë së Veriut dhe një mandat në Këshillin e Evropës. Bashkë me të ndjerin Arbër Xhaferi, për tetë vite ishte lobues i madh për pavarësinë e Kosovës dhe për pozitën e shqiptarëve në Ballkan. Profesor universitar dhe luftëtar i dalluar në Ushtrinë Çlirimtare të Kosovës dhe Ushtrinë Çlirimtare Kombëtare, ai do të jetë vlerë e shtuar në listën tonë”, ka shkruar Haradinaj.

Haradinaj përmes këtij postimi ka bërë të ditur edhe për disa emra të tjerë që do t’i shtohen AAK-së, ku në mesin e tyre janë: Ermira Retkoceri, Avdi Gërvalla, Rrezofat Azemi, Driton Jakupi, Fatime Lika, Premtim Burrniku, Nexhmije Sadiku e Lavdie Rexhepi.