Deputeti i Kuvendit të Kosovës nga radhët e PDK-së, Mërgim Lushtaku ka reaguar pas kidnapimit të tre policëve kosovarë nga policia serbe.

Lushtaku tha se Serbia shfaqi dëshirën për krim e gjenocid, derisa shtoi se ky veprim është akt praktik i shpalljës së luftës.

“Ta lëmë anash pamaturinë e Albinit, përfshirë mungesën e strategjisë operacionale dhe humbjen e miqve ndërkombëtarë, për Kosovën të gjithë duhet të jemi një.

Sot Serbia terroriste shfaqi agresivitetin e saj dhe dëshirën e saj për krim e gjenocid. Kidnapimi i policëve tanë në veri te vendit, nuk është asgjë më pak se akt praktik i shpalljës së luftës. Të gjitha institucionet e strukturat përgjegjëse të sigurisë duhet të jenë në nivelin më të lartë të gatishmërisë, ndërsa si popull të jemi të gatshëm për çdo gjë”, ka shkruar Lushtaku në Facebook.